కల్లబొల్లి మాటలతో రైతులను మోసం చేస్తున్న కూటమి ప్రభుత్వం
అనంతపురం జిల్లా : ముఖ్యమంత్రి చంద్రబాబు నాయుడు, డిప్యూటీ సీఎం పవన్ కళ్యాణ్, మంత్రి నారా లోకేష్‌ గాల్లో తిరగకుండా, పరదాలు కట్టుకొని తిరగకుండా భూమి మీద తిరిగి రైతుల వద్దకు వస్తే రైతుల బాధలు అర్థమవుతాయని మాజీ మంత్రి, నియోజకవర్గ సమన్వయకర్త డా. సాకే శైలజానాథ్ వ్యాఖ్యానించారు.కల్లబొల్లి మాటలతో రైతులను కూటమి ప్రభుత్వం మోసం చేస్తుంద‌ని మండిప‌డ్డారు. బుక్కరాయసముద్రం, సింగనమల, నార్పల, పుట్టూరు, యల్లనూరు, తాడిపత్రి తదితర ప్రాంతాల్లో అరటి పంటకు గిట్టుబాటు ధర లేక రైతులు గుండెకోతకు గురవుతున్నారని తెలిపారు. బుక్కరాయసముద్రం మండలం నీలారెడ్డిపల్లి, చేదళ్ల గ్రామాల్లో వైయ‌స్ఆర్‌సీపీ శ్రేణులతో కలసి అరటి తోటలను మాజీ మంత్రి డా. సాకే శైలజానాథ్ పరిశీలించారు. రైతులతో నేరుగా మాట్లాడి పంట నష్టం వివరాలను అడిగి తెలుసుకున్నారు.
మాజీ మంత్రి డా. సాకే శైలజానాథ్ మాట్లాడుతూ…అరటి పంట వేసిన రైతులకు కొనుగోలుదారులే లేరు… పండ్లను గొర్రెలకు ఇస్తున్న పరిస్థితి ఈ కూటమి ప్రభుత్వంలో వచ్చిందన్నారు. గ్రామ సచివాలయాల్లో కూర్చోకుండా, రైతు తోటల్లోకి వచ్చి రైతు బాధను కళ్లారా చూస్తే పరిస్థితి అర్థమవుతుందని వ్యాఖ్యానించారు.గిట్టుబాటు ధర లేని అరటి పంటను ప్రభుత్వం వెంటనే కొనుగోలు చేయాలని డిమాండ్ చేశారు. పంట పండించిన రైతులకు దలారుల వల్ల తీవ్ర నష్టం వాటిల్లుతోందని ఆవేదన వ్యక్తం చేశారు.
ప్రభుత్వ అధికారులు “ఏడున్నర వేలకే కొనుగోలు చేస్తాం” అని చెప్పారని, “మేమే పండిన పంటను అందిస్తాం… ఆ డబ్బులు నేరుగా రైతుల ఖాతాల్లోకి ఇవ్వండి” అని విన్నవించారు.
గిట్టుబాటు ధర లేక మొక్కజొన్న రోడ్ల మీద పడేసే దుస్థితి రాష్ట్రంలో కనిపిస్తోందన్నారు. కూటమి ప్రభుత్వం వచ్చాక ఏ రైతు ఆనందంగా లేడనే దుస్థితి నెలకొన్నదని పేర్కొన్నారు.
“ఢిల్లీ వాళ్లతో మాట్లాడాం… అక్కడ మాట్లాడాం…” అంటూ మాటలు కాకుండా, చేతలతో చేసి రైతుల కష్టాలను తీర్చాలని ప్రభుత్వాన్ని డిమాండ్ చేశారు.
గత వైయ‌స్ఆర్‌సీపీ ప్రభుత్వ హయాంలో మాజీ ముఖ్యమంత్రి వైఎస్ జగన్‌మోహన్ రెడ్డి రైతులపై భారం మోపకుండా, ప్రత్యేక రైలు ఏర్పాటు చేసి ఢిల్లీ మార్కెట్లో అమ్మకాలు జరిపి రైతులకు లాభం చేకూర్చారని… వారిని చూసి కూటమి నాయకులు బుద్ధి తెచ్చుకోవాలన్నారు.
కూటమి ప్రభుత్వం దిక్కుమాలిన పనులు మానేసి, రైతులకు లాభాలు చేకూరే విధంగా పనిచేస్తే రైతులు మరో పంట వేసుకునే ధైర్యం వస్తుందన్నారు.
“రాష్ట్రంలో రైతుల బాధ విమానాల్లో తిరిగేవారికి అర్థం కాదు… రివ్యూ మీటింగ్‌ల్లో కూర్చునే ముఖ్యమంత్రికి అర్థం కాదు” అని విమర్శించారు.
కూటమి నిద్రనటించడం మానేసి… రైతుల పక్షాన నిలబడి సమస్యలను పరిష్కరించాలి. రైతుల కోసం వైఎస్ఆర్సీపీ ఎప్పుడూ అండగా ఉంటుంది” అని స్పష్టం చేశారు.
కూటమి ప్రభుత్వం రైతులకు చేస్తున్న అన్యాయంపై ప్రతి ఒక్క రైతు ముందుకు రావాలని, “మీ తరఫున మేము మరోసారి పోరాటానికి సిద్ధంగా ఉన్నాం… అందరూ కలిసి రండి” అని రైతులను పిలుపునిచ్చారు.
ఈ కార్యక్రమంలో వైయ‌స్ఆర్‌సీపీ మండల అధ్యక్షుడు, జడ్పీటిసి, సర్పంచులు, ఎంపీటీసీలు, వైయ‌స్ఆర్‌సీపీ మండల నాయకులు, వైయ‌స్ఆర్‌సీపీ కార్యకర్తలు, రైతులు తదితరులు పాల్గొన్నారు.