చంద్రబాబూ ముస్లింలు నిన్నెందుకు నమ్మాలి?

హైదరాబాద్, 28 సెప్టెంబర్‌ 2012: తెలుగుదేశం పార్టీ అధ్యక్షుడు చంద్రబాబు నాయుడిని ముస్లింలు ఎప్పటికీ నమ్మబోరని వైయస్‌ఆర్‌ కాంగ్రెస్‌ పార్టీ మైనార్టీ నాయకుడు హబీబ్‌ అబ్దుల్‌ రెహ్మాన్‌ (హెచ్‌ఎ రెహ్మాన్‌) నిప్పులు చెరిగారు. వచ్చే ఎన్నికల్లో ముస్లింలకు 15 నుంచి 20 ఎమ్మెల్యే టిక్కెట్లు ఇస్తానంటూ చంద్రబాబు చెప్పడాన్ని ఆయన ఎద్దేవా చేశారు. 2014లో వచ్చే ఎన్నికల్లో టిడిపి నుంచి మొత్తంగా 10 మంది ఎమ్మెల్యేలు గెలిచే పరిస్థితి కూడా లేదన్న విషయాన్ని చంద్రబాబు తెలుసుకుంటే మంచిదని రెహ్మాన్‌ హితవు పలికారు. వైయస్‌ఆర్‌ కాంగ్రెస్‌ పార్టీ కేంద్ర కార్యాలయంలో శుక్రవారం మధ్యాహ్నం నిర్వహించిన పత్రికా ప్రతినిధుల సమావేశంలో ఆయన మాట్లాడారు. ముస్లిం మైనార్టీల వ్యతిరేకత విషయంలో ఎల్‌కే అద్వానీతో సమానంగా చంద్రబాబు వ్యవహరించారని ఈ సందర్భంగా ఆయన నిప్పులు చెరిగారు.