తిరుమల నెయ్యి వ్యవహారంలో లై డిటెక్టర్‌ టెస్టుకైనా సిద్ధం 

న్యూఢిల్లీ: తిరుమల నెయ్యి కల్తీ వ్యవహారంలో లై డిటెక్టర్‌ టెస్టుకైనా తాను సిద్ధమని వైయ‌స్ఆర్‌సీపీ పార్లమెంటరీ పార్టీ నాయకులు, టీటీడీ బోర్డు మాజీ ఛైర్మన్‌ వైవీ సుబ్బారెడ్డి ప్రకటించారు. బోర్డు ఛైర్మన్‌ పదవిని దేవుడికి సేవ చేసే అవకాశంగానే భావించాను తప్ప, ఎక్కడా టీటీడీ నిధుల్లో ఒక్క రూపాయి కూడా ఆశించలేదని, తన కుటుంబ సభ్యులు సైతం బోర్డు వ్యవహారాల్లో కలగజేసుకోలేదని ఆయన స్పష్టం చేశారు. నిజాయితీగా దేవుడికి సేవ చేశాను కాబట్టే, చంద్రబాబు వ్యాఖ్యలను ఖండిస్తూ సీబీఐ విచారణ కోరుతూ ముందుగా సుప్రీంకోర్టులో తానే  పిటిషన్‌ వేశానని ఢిల్లీలో మీడియాతో మాట్లాడిన వైవీ సుబ్బారెడ్డి గుర్తు చేశారు. ఒకపైపు సిట్‌ విచారణ జరుగుతుండగానే కొన్ని తెలుగు మీడియా సంస్థలు పని గట్టుకుని తనపై దుష్ప్రచారం చేస్తూ వైయ‌స్ఆర్‌ కాంగ్రెస్‌ పార్టీ మీద బురద జల్లుతున్నాయని, వాటన్నింటినీ ఖండిస్తూ, వాస్తవాలు తేటతెల్లం చేయడానికే ఢిల్లీలో మీడియా సమావేశం ఏర్పాటు చేసినట్లు చెప్పారు.
ప్రెస్‌మీట్‌లో వైవీ సుబ్బారెడ్డి ఏం మాట్లాడారంటే..:

అందుకే దానిపైనా దర్యాప్తు కోరాను:
    టీడీపీతో పాటు, చంద్రబాబు రాజకీయ ప్రయోజనాల కోసం కొన్ని తెలుగు మీడియా సంస్థలు తిరుమల ప్రతిష్టను ఫణంగా పెడుతున్నాయి. వైయ‌స్ఆర్‌సీపీ ప్రభుత్వ హయాంలో కేజీ నెయ్యి రూ.326కే కొంటే కల్తీ జరిగినట్లయితే.. మరి అంతకు ముందు టీడీపీ ప్రభుత్వ హయాంలో అదే కేజీ నెయ్యి రూ.276కే కొన్నప్పుడు కల్తీ జరిగినట్లు కాదా? అందుకే అన్నీ నిగ్గు తేల్చడం కోసం, సిట్‌ దర్యాప్తును కూడా 2019–24 మధ్య వైయ‌స్ఆర్‌సీపీహయాంకే పరిమితం చేయకుండా, అంతకు ముందు ప్రభుత్వ హయాం నాటి నెయ్యిపైనా విచారణ చేయాలని కోరాను.

ఏ తప్పూ చేయలేదు. అందుకే..:
    నేను టీటీడీ బోర్డు ఛైర్మన్‌గా ఉన్నప్పుడు ఒక డెయిరీ నెయ్యి కల్తీ గురించి ఫిర్యాదు అందితే, అన్ని డెయిరీ ట్యాంకర్లను పరిశీలించమని విచారణకు ఆదేశించాను. కానీ టీటీడీ అధికారులు శాంపిల్‌ రిపోర్టులు బోర్డు ముందుంచలేదు. అదలా ఉంటే, టీడీపీ కూటమి ప్రభుత్వం వచ్చాక, 2024 జూన్‌– జూలైలో వెనక్కి పంపిన ట్యాంకర్ల నెయ్యిని ఆగస్టులో ఎలా వాడారు?. నేను ఏ తప్పూ చేయలేదు. అందుకే సిట్‌ విచారణకు ధైర్యంగా వెళ్తున్నాను. పరకామణి చోరీ కేసుకు సంబంధించిన విచారణకు శుక్రవారం హాజరవుతున్నాను.

ఆలయాన్ని వేదిక చేయడం బాధాకరం:
    ప్రపంచంలోని కోట్లాది హిందువులకు పుణ్య క్షేత్రం, కలియుగ వైకుంఠం శ్రీ వేంకటేశ్వరస్వామి ఆలయం వేదికగా ఇటీవల జరగుతున్న రాజకీయాలు అత్యంత బాధాకరం. బాధ్యత గల స్థానాల్లో ఉన్న వారు తమ స్వార్థ రాజకీయాల కోసం ఆలయాన్ని వేదికగా చేసుకోవడం అత్యంత విచారకరం. లడ్డూ ప్రసాదంపై గత కొన్ని నెలలుగా దారుణంగా విషప్రచారం చేస్తున్నారు. 
    లడ్డూ ప్రసాదంలో కల్తీ నేయి కలిసిందనే ఆరోపణలపై ఓవైపు సిట్‌ దర్యాప్తు జరుగుతుండగానే, లీక్‌ల పేరిట మీడియాకు తప్పుడు సమాచారం ఇస్తూ, ఆలయ ప్రతిష్టను దారుణంగా దెబ్బ తీస్తున్నారు. నేను గతంలో లోక్‌సభ సభ్యుడిగా పని చేశాను. తర్వాత రెండు పర్యాయాలు టీటీడీ ఛైర్మన్‌గా పని చేశాను. ఆలయ ప్రతిష్టను పెంచేలా ప్రయత్నించాను తప్ప.. ఏ రోజు కూడా దేవుడి విషయంలో ఒక్క తప్పూ చేయలేదు. అసలు అలాంటి ఆలోచనా నా మనసులో ఎప్పుడూ లేదు. 

అందుకే మీడియా ముందుకొచ్చాను:
    నేను దాదాపు 30 సార్లు అయ్యప్ప మాల వేసుకుని దీక్ష చేశాను. నిరంతరం దేవుడి సేవలు, సాధువుల సేవలోనే నా కుటుంబం నిమగ్నమై ఉంటుంది. అయినా నాపై తప్పుడు ఆరోపణలు చేస్తూ, నిందలు వేస్తున్నారు. అందుకే ప్రజలకు వాస్తవాలు చెప్పడం కోసమే ఈరోజు ఇక్కడ మీడియా ముందుకొచ్చాను. 
    తిరుమల లడ్డూ వ్యవహారాన్ని ఒక రాజకీయ అంశంగా మార్చి,  వైయ‌స్ఆర్‌ కాంగ్రెస్‌ పార్టీకి, ఆ పార్టీ పార్లమెంటరీ పార్టీ నాయకుడిగా ఉన్న నన్ను లక్ష్యంగా చేసుకుని, ఎంతమేర వీలైతే అంతమేర రాజకీయ లబ్ధి పొందడానికి చంద్రబాబుగారు ప్రయత్నిస్తున్నారు. ఆయన చేస్తున్న దుష్ప్రచారం వల్ల ప్రజల్లో సందేహాలు, అనుమానాలు నెలకొంటే, వాటిని నివృతి చేయడం కోసమే ఈ ప్రెస్‌మీట్‌.

ఒకవేళ నేనే తప్పు చేసి ఉంటే.. ఆ పని చేస్తానా?:
    ఇక్కడ దురదృష్టం ఏమిటంటే.. తిరుమల శ్రీవారి లడ్డూ ప్రసాదంలో జంతువుల కొవ్వు కలిసిందని చంద్రబాబునాయుడు ఒక ముఖ్యమంత్రి స్థానంలో ఉండి ఆరోపణలు చేసిన నేపథ్యంలో తిరుమల శ్రీవారి ఆలయ ప్రతిష్టను, కోట్లాది మంది భక్తుల మనోభావాలను దృష్టిలో ఉంచుకుని నేను స్వయంగా సుప్రీంకోర్టులో రిట్‌ పిటిషన్‌ ఫైల్‌ చేశారు. నా తర్వాత మరో ముగ్గురు హిందూ సంస్థల తరఫున పిటిషన్లు వేశారు. అలాంటి నాపైనే తప్పుడు ఆరోపణలు, విష ప్రచారం  చేస్తున్నారు. ఒకవేళ నేను తప్పు చేసిన వ్యక్తినైతే నేనెందుకు స్వయంగా సుప్రీంకోర్టులో పిటిషన్‌ వేస్తాను?.

ఇవన్నీ వాస్తవాలు. అయినా విషప్రచారం:
    లడ్డూ ప్రసాదంలో వెజిటబుల్‌ ఫ్యాట్‌ కలిసిందని మొదట ఈవో అన్నారు. కాదు, జంతువుల కొవ్వు కలిసిందని సీఎం చంద్రబాబు అన్నారు. చివరకు లడ్డూ ప్రసాదంలో కలిసింది వెజిటబుల్‌ ఫ్యాటా? లేక జంతువుల కొవ్వాం అన్నది ఇప్పటివరకూ క్లారిటీ లేదు. కల్తీ జరిగిందని ఆరోపణలున్న ఆ రెండు నెయ్యి ట్యాంకర్లు అసలు లడ్డూ ప్రసాదం తయారీలోకి వెళ్లాయా లేదా అన్నదానిపైన కూడా ఇప్పటి వరకు క్లారిటీ లేదు. మరి కీలకమైన  ఈరెండు ప్రశ్నలకు సమాధానం లేకుండా ఏరకంగా విష ప్రచారాలు చేస్తారు?.
    ఏ నెయ్యి ట్యాంకరైనా లడ్డూ ప్రసాదం తయారీ కేంద్రానికి వెళ్లాలంటే.. కచ్చితంగా ఆ నెయ్యిని టీటీడీ ల్యాబ్‌ పరీక్షించాల్సిందే. నాణ్యతా ప్రమాణాలు సరిగ్గా లేకపోతే వాటిని వెంటనే వెనక్కి తిప్పి పంపుతారు. 2014–19 మధ్య చంద్రబాబు హయాంలో కూడా అలా ట్యాంకర్లు తిప్పి పంపారు. మా ప్రభుత్వ హయాంలో కూడా అలా 14 సార్లు ట్యాంకర్లను తిప్పి పంపడం జరిగింది. ఆ స్థాయిలో వ్యవస్థ పని చేస్తుండగా, కల్తీ నెయ్యి ఏరకంగా ప్రసాదం తయారీలోకి వెళ్తుంది?.
    పైగా కల్తీ నెయ్యి ఆరోపణలున్న ట్యాంకర్లు 2024 జూన్, జూలైలో వచ్చాయి. ఆ నెయ్యి లడ్డూ ప్రసాదంలో కలిసిందని టీడీపీ ఆరోపణలు చేస్తోంది. వారి ఆరోపణల ప్రకారం చూస్తే, అప్పుడు చంద్రబాబుగారే అధికారంలో ఉన్నారు. మరి ఎవరి మీద బురద‡జల్లుతారు?. ప్రత్యేక దర్యాప్తు బృందం (సిట్‌) తొలుత దాఖలు చేసిన ఛార్జ్‌షీట్‌ ప్రకారం చూస్తే జూన్, జూలైలో తిప్పి పంపిన ఈ నాలుగు ట్యాంకర్ల నెయ్యి తిరిగి 2024 ఆగస్టులో వేర్వేరు సరఫరాదారు ద్వారా సరఫరా చేయబడి లడ్డూ తయారీలో ఉపయోగించారని ఉంది. అలా చూసినా, అప్పుడున్నది చంద్రబాబు ప్రభుత్వమేగా? మరి ఈ ఆరోపణలు నిజమైతే ఈ తప్పుకు ఎవరిది బాధ్యత? చంద్రబాబు ప్రభుత్వనిదా? ఆయన టీటీడీలో పెట్టిన వారిదా?.
    అప్పుడు చంద్రబాబు హయాంలో ఉన్నదీ, తర్వాత జగన్‌గారి హయాంలో ఉన్నదీ ఒకటే ల్యాబ్‌. పైగా మా హయాంలో ఆ ల్యాబ్‌ బలోపేతం అయ్యింది. అందుకోసం జాతీయ డెయిరీ డెవలప్‌మెంట్‌ బోర్డు (ఎన్‌డీడీబీ)తో ఒప్పందం చేసుకుని, ల్యాబ్‌లో మరిన్ని పరికరాలు ఏర్పాటు చేశాం. దాదాపు రూ.80 లక్షల విలువైన అధునాతన పరికరాలు విరాళంగా అందించేలా వారిని ఒప్పించాము. తప్పు చేసే ఆలోచన ఉన్న వారు ఇవన్నీ చేస్తారా?.  
    ఈ మధ్య పత్రికల్లో, ఇతర మీడియా సంస్థల్లో 2019–24 మధ్య తయారైన లడ్డూలన్నీ కూడా కల్తీ నెయితోనే తయారు చేశారని, దాదాపు 20 కోట్ల లడ్డూలు ఇలానే తయారయ్యాయని సిట్‌ చెప్పిందంటూ రాస్తున్నారు. సిట్‌ విచారణ జరుగుతుంటే ఇవన్నీ ఎలా బయటకొస్తున్నాయి?. దేవుడి ప్రసాదం మీద ఇన్ని నిందలా? రాజకీయాల కోసం ఇలా దిగజారిపోయి ఆరోపణలు చేస్తారా? మీడియా సంస్థలు కూడా నియంత్రణ పాటించకపోవడం విచారకరం?

ఎందుకలా తప్పుడు ప్రచారం?:
    తిరుమల క్షేత్రానికి నెయ్యి సరఫరాపై ప్రతి ఆరునెలలకోసారి టెండర్‌ ప్రక్రియ జరుగుతుంది. 2024 జూన్, జూలైలో తిప్పి పంపిన ఆ నాలుగు ట్యాంకర్లకు సంబంధించిన టెండర్లో పాల్గొన్న ఏఆర్‌ డెయిరీ కంపెనీ, నెయ్యిని సప్లై చేయడం అన్నది జూన్‌ నుంచే మొదలైంది. అంతే కాకుండా ఆ కంపెనీ తిరుమలకు సప్లై చేయడం కూడా అదే తొలిసారి. మరి 2019–24 మధ్య ఏరకంగా ప్రసాదంలో కల్తీ నెయ్యి కలిసిందని చెప్పగలుగుతున్నారు? పైగా టీటీడీలో ఒకే సంస్థ నుంచి నెయ్యి సప్లై ఎప్పుడూ లేదు. అంత క్వాంటిటీ కూడా ఒకే సంస్థ వద్ద లేదు. కనీసం మూడు, నాలుగు సంస్థలు ఉంటాయి. మరి ఏరకంగా ఇలాంటి తప్పుడు ప్రచారం చేయగలుగుతున్నారు. 
    చంద్రబాబు హయాంలో కూడా నాణ్యతా ప్రమాణాలు లేవని దాదాపు 18 ట్యాంకర్లు తిప్పి పంపారు. మా హయాంలో ట్యాంకర్లను తిప్పి పంపడమే మీ విష ప్రచారాలకు ఆధారం అయితే, అదే చంద్రబాబు ప్రభుత్వానికి కూడా వర్తిస్తుంది కదా?. నెయ్యి నాణ్యతపై ఫిర్యాదు అందితే పరీక్షలు చేయించి సంబంధిత కంపెనీని బ్లాక్‌ లిస్ట్‌లో పెట్టించాను. ఒకవేళ తప్పు చేసే ఉద్దేశం ఉంటే, ఆ కంపెనీని బ్లాక్‌ లిస్ట్‌లో పెడతానా?.
    మేం కిలో నెయ్యి రూ.326కు కొనుగోలు చేశామని, కల్తీ నెయ్యి కావడం వల్లే ఇంత తక్కువ ధరకు వచ్చిందంటూ ప్రచారం చేస్తున్నారు. వాస్తవం ఏంటంటే.. ప్రతి 6 నెలలకూ ఈ రేట్లు మారుతూ ఉంటాయి. ఒక సందర్భంలో ఒకసారి మాత్రమే ఈ రేటు ఉంటుంది. టెండర్లు బట్టి ఈ రేట్లు రూ.400 దాటి కూడా వెళ్లాయి. కానీ వాస్తవాలను కప్పిపెట్టి తప్పుడు ప్రచారం చేస్తున్నారు. 

దాన్ని కూడా కల్తీ నెయ్యిగా భావించాలా?:
    మేము కేజీ నెయ్యి రూ.326కి కొనడం తప్పయితే, దాని వల్లే నెయ్యి కల్తీ జరిగిందని, అదే నిర్ధారణగా తీసుకుని ప్రచారం చేస్తే.. మరి  2014–19 మధ్య చంద్రబాబుగారి హయాంలో రూ.276, రూ.279, రూ.295 చొప్పున నెయ్యి కొనుగోలు చేశారు. మరప్పుడు అది కూడా కల్తీ నెయ్యి అని భావించాలా?.
    అందుకనే నేను మొన్న సిట్‌ విచారణ సమయంలో అధికారులను రిక్వెస్ట్‌ చేశాను. మీ దర్యాప్తు మొత్తం 2019 నుంచి 2024 వరకు మాత్రమే కాకుండా గడచిన 10–15 ఏళ్ల కాలం నుంచి కూడా చేయమని కోరాను. ఈ సమగ్ర దర్యాప్తుతోనే వాస్తవాలు వెల్లడవుతాయన్నది నా విశ్వాసం. లేదంటే ఇది సెలెక్టివ్‌ విచారణే అవుతుందన్నది నా అభిప్రాయం. ప్రసాదంలో జంతువుల కొవ్వు కలిసిందని ఆరోపణలు చేసిన తర్వాత కూడా 2024 సెప్టెంబరులో కిలో నెయ్యి కేవలం రూ.475కే కొనుగోలు చేశారు. మరి వారి వాదనల ప్రకారం ఇది కూడా కల్తీ నెయ్యే కదా?.

నాపై ఏ ఆరోపణ లేదు. రాలేదు:
    టీటీడీ కార్యకలాపాల నుంచి ఆర్థికంగా లాభపడాలని, అందులో అవినీతి చేయాలన్న తలంపు కానీ, ఆలోచన ఏరోజూ నాకు లేదు. అలాంటి ఊహ కూడా ఏరోజు రాలేదు. టీటీడీలో నెయ్యి సరఫరా అన్నది కేవలం ఒక అంశం. అదే కాకుండా టీటీడీలో విలువైన పనులకు, వివిధ సప్లైల కోసం వందల కోట్ల విలువైన టెండర్లు, కాంట్రాక్టుల కోసం ఖర్చు చేస్తారు. కానీ, నాపై ఏరోజు కూడా ఒక్క ఆరోపణ కూడా రాలేదు. 

మరి వాటిపైనా విచారణకు సిద్ధమా?:
    తిరుపతిలో శ్రీనివాస సేతు ఫ్లైఓవర్‌ నిర్మాణాన్ని టీటీడీ బోర్డు అనుమతి లేకుండా చంద్రబాబుగారి ప్రభుత్వం 2014–19లో ప్రారంభించింది. టెండర్‌ రేటును అనూహ్యంగా పెంచేశారు. మేము వచ్చాక దాన్ని పూర్తి సమీక్ష చేసి సుమారు రూ.90 కోట్ల నుంచి రూ.100 కోట్లు ఆదా చేశాం. మేం నిజాయితీగా ఉన్నాం. అయినా మామీద నిందలు వేస్తున్నారు. 
    టీటీడీ సొమ్మును చంద్రబాబుగారి ప్రభుత్వంలో నిబంధనలకు విరుద్ధంగా ఎస్‌ బ్యాంక్‌ అనే ప్రైవేటు బ్యాంకులో రూ.1200 కోట్లు డిపాజిట్‌ చేశారు. వెంటనే ఆ సొమ్మును తిరిగి జాతీయ బ్యాంకుల్లోకి డిపాజిట్‌ చేశాం. మేం చేసిన ఒకటి రెండు నెలలకే ఎస్‌ బ్యాంకు, సంక్షోభంలో కూరుకుపోయింది. ఇది చంద్రబాబు ప్రభుత్వం చేసిన పెద్ద తప్పిదం కాదా? ఏం ఆశించి అంత పెద్ద మొత్తంలో ప్రైవేటు బ్యాంకులో దేవుడి సొమ్మును డిపాజిట్‌ చేసినట్టు? కానీ మేము ఈ విషయాన్ని రాజకీయాలకు వాడుకోలేదు కదా?. మరి వాటిపైనా విచారణకు సిద్ధమా? సీఎం చంద్రబాబుకు ఇదే మా సవాల్‌.

ఎన్నో సంస్కరణలు. భక్తులకూ సదుపాయాలు:
    తిరుమలలో వీఐపీ సంçస్కృతి నివారించడానికి చాలా గట్టి ప్రయత్నం చేశాం. ఎల్‌–1, ఎల్‌–2 బ్రేక్‌ దర్శనాలను రద్దు చేశాం. బ్రేక్‌ దర్శనాల వేళల్ని మార్చాం. దీంతో పెద్ద ఎత్తున సామాన్య భక్తులకు ఊరట కలిగింది. ఎంతో పారదర్శకంగా ఉండాలని శ్రీవాణి ట్రస్టు తెచ్చాం. దాని ద్వారా ఎవరైనా రూ.10,500 కట్టి శీఘ్ర దర్శనం చేసుకునే వీలు కల్పించాం. మొట్టమొదటిసారిగా తిరుమలలో ప్లాస్టిక్‌ వాడకాన్ని పూర్తిగా నిషేధించాం. మేం తెచ్చిన విధానాలనే ఇవ్వాళ్టికీ అనుసరిస్తున్నారు. హిందూ మతంలో గోమాతకున్న విశిష్టతను పరిగణనలోకి తీసుకుని గుడికో గోమాత కార్యక్రమాన్ని 141 ఆలయాల్లో చేశాం. 516 గోశాలలకు ఆర్థిక సహాయం చేశాం. గో మహా సమ్మేళనం నిర్వహించాం. 
    స్వామివారి నైవేద్యానికి వినియోగించే పదార్థాలు పూర్తిగా గో ఆధారిత ఉత్పత్తులే వాడాం. ఆర్గానికే ఉత్పత్తులే వాడాం. టీటీడీ గోశాల నుంచి 100 ఆవులను తిరుమలకు తరలించి.. ఆ పాలతో తయారు చేసిన నెయ్యినే వాడే సాంప్రదాయానికి మేమే అంకురార్పణ చేశాం. 
    చిన్న పిల్లల గుండె చికిత్స చేయించడం కోసం 50 వేల చదరపు అడుగుల విస్తీర్ణంలో రూ.350 కోట్లతో శ్రీ పద్మావతి మల్టీ స్పెషాలిటీ ఆస్పత్రిని నిర్మించాం. మా హయాంలో నాలుగేళ్లలో 3 వేల మంది చిన్నారులకు ఇక్కడ గుండె చికిత్సలు ఉచితంగా నిర్వహించాం.  
    అన్నింటికి మించి టీటీడీ ఆస్తులపై తొలిసారి శ్వేతపత్రం విడుదల చేశాం. స్వామివారికి చెందిన దాదాపు 960 రకాల ఆస్తులపై శ్వేత పత్రం విడుదల చేశాం. దేవుడికి సంబంధించిన ఈ ఆస్తులు అమ్మరాదని బోర్డు నిర్ణయం కూడా చేశాం. ఈ రకంగా ఎన్నో రకాలుగా తిరుమల తిరుపతి దేవస్థానంలో గొప్ప మార్పులు తేవడం జరిగింది.
    కానీ, ఈ ప్రభుత్వం వచ్చాక, వైకుంఠ ఏకాదశి టోకెన్ల జారీ విషయంలో సరైన ప్రణాళిక లేకుండా వ్యవహరించారని, ఫలితంగా తొక్కిసలాట జరిగి ఆరుగురు భక్తులు ప్రాణాలు కోల్పోయారని వైవీ సుబ్బారెడ్డి గుర్తు చేశారు. 

మీడియా ప్రశ్నలకు బదులిస్తూ..
    2013 నుంచి 2024 వరకు నెయ్యి ధరల వివరాలు మీడియాకు ఇస్తున్నా. పరకామణి చోరీ విషయంలో సిట్‌ అధికారులు నాకు ఫోన్‌ చేశారు. నేడు ఢిల్లీలో ఉన్న నేపథ్యంలో రాలేనని చెప్పాను. రేపు (శుక్రవారం) విచారణకు వెళ్తున్నాను. అధికారులు ప్రిపేర్‌ చేసిన అంశాలు బోర్డు దృష్టికొస్తాయి. బోర్డు సభ్యుల ఆమోదం మేరకే ఏ నిర్ణయాలైనా జరుగుతాయి తప్ప, ఛైర్మన్‌ వ్యక్తిగత నిర్ణయం ఉండదు.     తిరుమల కల్తీ నెయ్యి వ్యవహారంలో విచారణ ఇంకా పూర్తి కాలేదని సిట్‌ అధికారులు నాతో చెప్పారు. కోర్టు ముందుంచే వరకు దర్యాప్తుకి సంబంధించి ఎలాంటి విషయాలు వెల్లడించబోమని చెప్పారు.
    2019కి ముందు కూడా కనీసం పదేళ్ల పాటు లడ్డూ వ్యవహారంపై విచారణ చేయాలని సిట్‌ని కోరడం జరిగింది. ఎందుకంటే మా హయాంలో కేజీ నెయ్యి రూ.326కి కొంటే, అంతకు ముందు టీడీపీ హయాంలో అదే కేజీ నెయ్యిని రూ.276 వరకు కొన్నారు. మరి రూ.326కి కొన్నప్పుడు కల్తీ జరిగిందంటున్నప్పుడు, అంత కంటే అంత తక్కువ ధరకు కొంటే, అందులోనూ కల్తీ ఉండదా? ఆ వాస్తవాలు నిగ్గు తేల్చడం కోసమే.. 2019కి పదేళ్ల ముందు నుంచి విచారణ చేయాలని కోరాను. నా విజ్ఞప్తిని సిట్‌ పరిగణనలోకి తీసుకుంటుందని భావిస్తున్నా. 
    అప్పన్నతో 2018 నుంచి నాకు సంబంధం లేదని సిట్‌ విచారణ సందర్భంగా చెప్పాను. అలాంటప్పుడు ఆయన ఆర్థిక లావాదేవీలతో నాకేం సంబంధం ఉంటుంది. నాకు నెయ్యి కల్తీ గురించి ఫిర్యాదు అందితే అన్ని డెయిరీల శాంపిల్స్‌ పరిశీలించమని ఆదేశించడం జరిగింది. కానీ రిపోర్టు వచ్చాక అధికారులు బోర్డు ముందు ఉంచలేదు. అధికారులు రిపోర్టు బోర్డు ముందు ఉంచితే ఏం జరిగిందో వాస్తవాలు తెలిసేవి. ఈ సంగతి కూడా సిట్‌ కి తెలియజేశాను. ఇంకా రవికుమార్‌ ఆస్తులు దొంగతనం ద్వారా సంపాదించాడన్న విషయం మాకు తెలియదు. దాతలు బోర్డుకి విరాళాలు ఇస్తామంటే సక్రమంగా ఉన్నాయో లేదో చూసుకుని ఆమోదించడం వరకే తమ పని అని వైవీ సుబ్బారెడ్డి స్పష్టం చేశారు.