టెస్లా కంపెనీకి ప్రత్యేక రాయితీలు లేవు

న్యూఢిల్లీ : ఎలక్ట్రిక్ కార్ల కంపెనీ టెస్లాకు ప్రత్యేకంగా ఎలాంటి రాయితీలను కల్పించడం లేదని భారీ పరిశ్రమల శాఖ సహాయ మంత్రి కృష్ణ పాల్ గుర్జర్ స్పష్టం చేశారు. భారత్‌లో ఎలక్ట్రిక్‌ కార్ల తయారీ పరిశ్రమ నెలకొల్పేందుకు రాయితీలతో కూడిన ప్రత్యేక విధానం ఏదీ ప్రభుత్వం రూపొందించలేదని కూడా ఆయన పేర్కొన్నారు. రాజ్యసభలో శుక్రవారం వైయ‌స్ఆర్‌సీపీ పార్ల‌మెంట‌రీ పార్టీ నేత‌ వి.విజయసాయి రెడ్డి అడిగిన ప్రశ్నకు మంత్రి రాతపూర్వకంగా జవాబిస్తూ ఈ విషయం వెల్లడించారు. దేశంలో ఎలక్ట్రిక్ కార్లతోపాటు అత్యాధునిక ఆటోమోటివ్ టెక్నాలజీ (ఏఏటి)తో కూడిన ఉత్పాదనల కోసం ప్రభుత్వం ఉత్పత్తితో ముడిపడిన రెండు ప్రోత్సాహక పథకాలను (పిఎల్ఐ)ను రూపొందించినట్లు ఆయన తెలిపారు. ఏఏటితోపాటు దేశంలో అడ్వాన్స్‌డ్‌ కెమిస్ట్రీ సెల్‌ (ఏసిసి) బ్యాటరీల ఉత్పాదనను కూడా పిఎల్‌ఐ స్కీమ్‌లో చేర్చినట్లు చెప్పారు.
నేషనల్‌ ప్రోగ్రామ్‌ ఆన్‌ అడ్వాన్స్‌డ్ కెమిస్ట్రీ సెల్స్‌ (ఏసిసి) బ్యాటరీ స్టోరేజి కార్యక్రమం కింద ఈ రంగంలో దేశీయంగా ఏసిసి బ్యాటరీలను ఉత్పత్తిని ప్రోత్సహించే లక్ష్యంతో 2021 మే 12న ప్రభుత్వం ఉత్పత్తితో ముడిపడ్డ ప్రోత్సాహక పథకాన్ని ప్రకటించింది. దీని కోసం 18 వేల 100 కోట్ల రూపాయలను బడ్జెట్‌లో కేటాయించింది. దేశంలో 50 గిగావాట్ అవర్స్‌ (జిడబ్లుహెచ్) సామర్ధ్యం వరకు ఏసిసి బ్యాటరీల ఉత్పత్తి సామర్ధ్యాన్ని స్థాపించడం ఈ పథకం ఉద్దేశం అని మంత్రి పేర్కొన్నారు. ఇక ఆటోమొబైల్‌, అటో విడిభాగాల పరిశ్రమ కోసం 2021 సెప్టెంబర్‌ 15న ఉత్పత్తితో ముడిపడ్డ ప్రోత్సాహక పథకం (పిఎల్‌ఐ)ని ప్రభుత్వం ఆమోదించింది. దీని కోసం 25 వేల 938 కోట్ల రూపాయల బడ్జెట్‌ కేటాయింపు జరిగింది. దేశంలో ఎలక్ట్రిక్‌ వాహనాలు, వాటి విడిభాగాలతోపాటు అత్యంత అధునాతన ఆటోమోటివ్‌ టెక్నాలజీ ఉత్పాదనలను ప్రోత్సహించడం ఈ పథకం లక్ష్యం. అయితే ఈ పిఎల్‌ఐ స్కీం కోసం కెంపెనీల నుంచి దరాఖాస్తుల స్వీకరణకు తుది గడువు ముగిసిపోయిందని మంత్రి వెల్లడించారు. అడ్వాన్స్‌డ్ కెమిస్ట్రీ సెల్స్‌ బ్యాటరీ స్టోరేజి కార్యక్రమం కిం ఈ ఏడాది జనవరి 24న ప్రకటించిన పిఎల్‌ఐ పథకానికి ఆసక్తిగల కంపెనీల నుంచి రిక్వెస్ట్‌ ఫర్‌ ప్రపోజల్స్‌ను ఆహ్వానించడం జరిగింది. దీనికి అమెరికాకు చెందిన టెస్లా కంపెనీ కూడా ఆర్‌ఎఫ్‌పి పంపించవచ్చని భారీ పరిశ్రమల శాఖ సహాయ మంత్రి పేర్కొన్నారు. 

రైతు ఉత్పత్తిదారుల సంఘాలకు క్రెడిట్‌ గ్యారంటీ
రైతు ఉత్పత్తిదారుల సంఘాల (ఎఫ్‌పివో)ను ప్రోత్సాహించే ఉద్దేశంతో  కేంద్ర ప్రభఉత్వం అమలు చేస్తున్న క్రెడిట్‌ గ్యారంటీ స్కీం కింద ఆంధ్రప్రదేశ్‌లో 406 రైతు ఉత్పత్తిదారుల సంఘాలు (ఎఫ్‌పివో) రిజిస్టర్ అయినట్లు కేంద్ర వ్యవసాయ, రైతు సంక్షేమ శాఖ మంత్రి శ్రీ అర్జున్ ముండా వెల్లడించారు. రాజ్యసభలో శుక్రవారం వైయ‌స్ఆర్‌సీపీ పార్ల‌మెంట‌రీ పార్టీ నేత‌ వి.విజయసాయి రెడ్డి  అడిగిన ప్రశ్నకు మంత్రి రాతపూర్వకంగా బదులిస్తూ ఈ ఏడాది జనవరి 31 నాటికి దేశవ్యాప్తంగా 7906 రైతు ఉత్పత్తిదారుల సంఘాలు ఈ పథకం కింద రిజిస్టర్ అయినట్లు తెలిపారు. ఉత్తర ప్రదేశ్, మధ్యప్రదేశ్, మహారాష్ట్ర, బీహార్, రాజస్థాన్, ఒడిశా రాష్ట్రాల తరువాత అత్యధిక ఎఫ్‌పీఓ (ఫార్మర్ ప్రోడ్సూసర్ ఆర్గనైజేషన్స్) రిజిస్టర్ అయిన రాష్ట్రాల జాబితాలో ఏపీ ఏడవ స్థానంలో ఉందని అన్నారు. రూ.4496 కోట్ల బడ్జెట్‌తో 2019-20 నుంచి 2023-24 వరకు 5 ఏళ్ళ కాలానికి రైతు ఉత్పత్తిదారుల సంఘాల ఏర్పాటు, ప్రోత్సాహం పథకం ప్రారంభించినట్లు మంత్రి తెలిపారు. ఎఫ్‌పివోలు రిజిస్టర్ అయిన తేదీ నుంచి నుంచి 5 ఏళ్ళపాటు రుణ సహకారం అందించేందుకు  2024-25 నుంచి 2027-28 వరకు అదనంగా మూడేళ్ళ కాలానికి రూ.2369 కోట్ల రుణ సాయం అందిస్తున్నట్లు తెలిపారు.
పథకం ప్రారంభం నుంచి 2023-24వరకు ఏర్పాటైన ఎప్‌ఫీఓలకు 2027-28వరకు ఐదేళ్ళపాటు ఈ పథకం కింద సహకారం అందిస్తున్నట్లు మంత్రి తెలిపారు. ఈ పథకం కింద ఎఫ్‌పీఓలకు రుణ సహాయం అందించేందుకు క్రెడిట్ గ్యారంటీ ఫండ్‌ను ఏర్పాటు చేసినట్లు మంత్రి తెలిపారు. ఎఫ్‌పివోల కింద నమోదై రైతుల సమీకరణతోపాటు వ్యవసాయోత్పత్తులు చేస్తున్న వారు మాత్రమే క్రెడిట్ గ్యారెంటీ ఫండ్‌కు అర్హులని మంత్రి అన్నారు. ఈ మేరకు దేశంలో 2024 జనవరి 31 నాటికి 1097 ఎఫ్‌పివోలకు క్రెడిట్ గ్యారెంటీ   కింద రూ.246.04 కోట్లు  అందించినట్టు మంత్రి తెలిపారు.

2023 డిసెంబర్ 31 నాటికి దేశవ్యాప్తంగా 10 వేల రైతు ఉత్పత్తిదారుల సంఘాలు ఏర్పాటు, ప్రోత్సాహం పథకం అమలు చేస్తున్న ఏజెన్సీలకు రూ.1054.56 కోట్లు విడుదల చేసినట్లు మంత్రి తెలిపారు. ఎఫ్ పీఓలు, సీబీబీఓ (క్లస్టర్ బేస్డ్‌ బిజినెస్ ఆర్గనైజేషన్స్) ద్వారా చేసే ఖర్చు ఆయా సంఘాలు ఏర్పాటైన నుంచి 3 సంవత్సరాల వరకు చేసే రైతుల సమీకరణ, అద్దె చెల్లింపు, ఉద్యోగుల వేతనాలు, ఇతర ముఖ్య కార్యక్రమాలపై ఆధారపడి ఉంటుంది. గత రెండు ఆర్థిక సంవత్సరాల్లో 66 శాతానికి మించి 7960 రైతు ఉత్పత్తిదారుల సంఘాలు ఏర్పాటైనట్లు మంత్రి పేర్కొన్నారు.