తాడేపల్లి: ఆంధ్రప్రదేశ్లో చట్టబద్ధ పాలన స్థానంలో భయపెట్టే పాలన చోటు చేసుకుంటోందనే ఆందోళనలు రోజురోజుకూ పెరుగుతున్నాయని వైయస్ఆర్సీపీ అధినేత వైయస్ జగన్మోహన్రెడ్డి పేర్కొన్నారు. ప్రజలు ఇప్పుడు నేరస్తులను కాదు, పోలీసులనే ఎక్కువగా భయపడే పరిస్థితి ఏర్పడిందా అనే ప్రశ్న రాష్ట్రవ్యాప్తంగా వినిపిస్తోంది. గాదె సాయికృష్ణ కస్టోడియల్ డెత్ ఆరోపణలు, ఆయన మృతదేహాన్ని రహస్యంగా దహనం చేశారనే విమర్శలు, పోలీసుల వేధింపులను సెల్ఫీ వీడియోలో వెల్లడిస్తూ ఆత్మహత్య చేసుకున్న క్రాంతికుమార్ ఘటనతో పాటు ఇటీవల వెలుగుచూసిన అనేక సంఘటనలు రాష్ట్రంలో పోలీసింగ్ తీరుపై తీవ్రమైన అనుమానాలకు తావిస్తున్నాయని ఆయన పేర్కొన్నారు. ఈ మేరకు వైయస్ జగన్ ఓ ప్రకటన విడదల చేశారు. రెడ్బుక్ పాలనపై వైయస్ఆర్సీపీ హెచ్చరికలే నిజమయ్యాయా? రాజకీయ కక్షసాధింపుల కోసం ‘రెడ్బుక్ పాలన’ అమలు చేస్తే వ్యవస్థలు భ్రష్టుపట్టే ప్రమాదం ఉందని వైయస్ఆర్సీపీ గతంలోనే హెచ్చరించింది. రాజకీయ ప్రత్యర్థులు, సోషల్ మీడియా కార్యకర్తలు, పాత్రికేయులు, మేధావులు, భిన్నాభిప్రాయాలు వ్యక్తం చేసే వారిని లక్ష్యంగా చేసుకోవడం ద్వారా ప్రారంభమైన ఈ ధోరణి ఇప్పుడు సాధారణ ప్రజలపైనా ప్రభావం చూపుతోందనే విమర్శలు వ్యక్తమవుతున్నాయి. చట్టాన్ని అమలు చేయాల్సిన వ్యవస్థే భయానికి కారణంగా మారడం ప్రజాస్వామ్యానికి ప్రమాదకర సంకేతం. సాయికృష్ణ, క్రాంతికుమార్ ఘటనలు రాష్ట్రాన్ని కలచివేశాయి గాదె సాయికృష్ణ ఘటన రాష్ట్ర ప్రజలను తీవ్ర ఆవేదనకు గురి చేసింది. తన కుమారుడి ఆచూకీ కోసం తల్లి గాదె విజయలక్ష్మి అధికారుల చుట్టూ తిరుగుతూ కనీసం తన కుమారుడి బూడిదనైనా అప్పగించాలని వేడుకోవాల్సిన పరిస్థితి ఏర్పడింది. అదే విధంగా క్రాంతికుమార్ ఆత్మహత్యకు ముందు విడుదల చేసిన సెల్ఫీ వీడియోలో పోలీసుల వేధింపులే తన మరణానికి కారణమని పేర్కొనడం కూడా తీవ్ర చర్చకు దారితీసింది. ఈ ఘటనలు ప్రజల్లో పోలీసు వ్యవస్థపై ఉన్న నమ్మకాన్ని దెబ్బతీస్తున్నాయనే అభిప్రాయాలు వ్యక్తమవుతున్నాయి. వరుస ఘటనలు... యాదృచ్ఛికమా? వ్యవస్థాగత వైఫల్యమా? తునిలో తిరుపతమ్మ, శ్రీకాకుళం జిల్లాలో కలావతి, కర్నూలు జిల్లాలో గంగమ్మ వంటి ఘటనలు కూడా పోలీసు వ్యవస్థపై ప్రశ్నలు లేవనెత్తుతున్నాయి. పోలీసుల వేధింపులు, విచారణ పేరుతో చిత్రహింసలు, అనంతరం కుటుంబ సభ్యులు న్యాయ విచారణ కోరాల్సిన పరిస్థితులు పునరావృతమవుతుండటం యాదృచ్ఛికం కాదనే అభిప్రాయం వ్యక్తమవుతోంది. ఇవి రాష్ట్రంలో పెరుగుతున్న అధికార దుర్వినియోగానికి, వ్యవస్థాగత వైఫల్యానికి సూచికలుగా కనిపిస్తున్నాయని విమర్శకులు చెబుతున్నారు. చట్టాన్ని అమలు చేస్తున్నారా? లేక శిక్షలు విధిస్తున్నారా? చిన్న చిన్న ఆరోపణలకే ప్రతిపక్ష కార్యకర్తలను బహిరంగంగా అవమానించడం, రోడ్లపై ఊరేగించడం వంటి చర్యలు నైతిక పోలీసింగ్గా మారిపోయాయని విమర్శలు వినిపిస్తున్నాయి. చట్టాన్ని అమలు చేసే అధికారులుగా వ్యవహరించాల్సిన పోలీసులు న్యాయమూర్తులు, జ్యూరీ, శిక్ష విధించే అధికారుల్లా వ్యవహరిస్తున్నారనే అభిప్రాయాలు వ్యక్తమవుతున్నాయి. మరోవైపు ప్రతిపక్ష నేతలు, కార్యకర్తలు ఇచ్చే ఫిర్యాదులు పట్టించుకోకపోవడం ద్వంద్వ వైఖరికి నిదర్శనంగా పేర్కొంటున్నారు. జవాబుదారీతనం ఎవరిది? రాష్ట్రంలో పోలీసింగ్పై వస్తున్న ఆరోపణలకు డీజీపీ, హోంమంత్రి, ముఖ్యమంత్రి సమాధానం చెప్పాల్సిన అవసరం ఉందని పలువురు అభిప్రాయపడుతున్నారు. ఆంధ్రప్రదేశ్లో పాలన భారత రాజ్యాంగం ప్రకారం నడవాలే గానీ, రాజకీయ కక్షసాధింపుల ఆధారంగా కాకూడదని ప్రజాస్వామ్య వాదులు చెబుతున్నారు. ప్రజాస్వామ్యానికి ప్రమాదకర సంకేతం ప్రజల హక్కులను పరిరక్షించడం, చట్టాన్ని అమలు చేయడం, న్యాయాన్ని కాపాడటం పోలీసుల ప్రధాన బాధ్యత. కానీ న్యాయం స్థానంలో భయం, చట్టం స్థానంలో అధికారం నిలబడితే చివరికి నష్టపోయేది ప్రజాస్వామ్యమే. రాష్ట్రంలో వెలుగుచూస్తున్న ఘటనలు అదే ప్రమాదాన్ని సూచిస్తున్నాయనే ఆందోళన వ్యక్తమవుతోందని వైయస్ జగన్ తన స్టేట్మెంట్లో పేర్కొన్నారు.
