సామాజిక విప్లవం ..సంక్షేమం సఫలం

కోటిన్నర కుటుంబాలకు సంక్షేమ ఫలాలు
 
ఎనిమిది నెలల్లో ప్రతి కుటుంబం తలుపు తట్టిన రాష్ట్ర ప్రభుత్వం

వివిధ పథకాల కింద రూ.14,795.21 కోట్లు పంపిణీ

అమ్మఒడి కింద 42.01 లక్షల మంది తల్లుల ఖాతాల్లో రూ.6,302 కోట్లు 

వైయస్‌ఆర్‌ రైతు భరోసా కింద 46.50 లక్షల కుటుంబాలకు రూ.6,299 కోట్లు

దేశంలో ఏ సీఎం చేయని విధంగా ఇచ్చిన మాటకు కట్టుబడిన సీఎంగా గుర్తింపు

ఎన్నికల మేనిఫెస్టో అమలుకు అసలు సిసలు నిర్వచనం 

ఎనిమిది నెలల్లోనే సామాజిక విప్లవం.. అన్ని వర్గాలకు సమ న్యాయం

ఆర్థిక వ్యవస్థ ముందుకు వెళ్లడానికి ఉత్ప్రేరకం అని నిపుణుల విశ్లేషణ 

అమరావతి: ముఖ్యమంత్రిగా బాధ్యతలు చేపట్టిన ఎనిమిది నెలల్లోనే ప్రజా సంక్షేమంపై వైయస్‌ జగన్‌మోహన్‌రెడ్డి తనదైన ముద్ర వేశారు. ఆర్థిక మందగమనం సమయాల్లో వృద్ధి రేటు పెంచేందుకు కేంద్ర, రాష్ట్ర ప్రభుత్వాలు కార్పొరేట్‌ సంస్థలకు ఉద్దీపన పథకాలు ప్రకటిస్తాయి. అయితే రాష్ట్రంలో అందుకు పూర్తి భిన్నంగా కోటిన్నరకుపైగా పేద, సాధారణ కుటుంబాల ప్రజల కొనుగోలు శక్తిని పెంచడానికి సంక్షేమ పథకాల ద్వారా ప్రభుత్వం రూ.14,795.21 కోట్లు ఆర్థిక సహాయం రూపంలో అందజేసింది. దీని వల్ల ప్రజల్లో కొనుగోలు శక్తి పెరుగుతుందని.. ఆర్థిక వ్యవస్థ కూడా గాడిలో పడుతుందని, ఆర్థిక మందగమనానికి ఇదే విరుగుడని ఆర్థిక వేత్తలు ప్రశంసిస్తున్నారు. సీఎం జగన్‌ తీసుకున్న ఈ నిర్ణయం వల్ల సామాజిక విప్లవం ప్రారంభమైందని విశ్లేషిస్తున్నారు.

ఎన్నికల మేనిఫెస్టోను బైబిల్, ఖురాన్, భగవద్గీతలాగ భావిస్తానని ముఖ్యమంత్రిగా ప్రమాణ స్వీకారం చేసిన వేదికపై ప్రకటించిన జగన్‌మోహన్‌రెడ్డి ఎనిమిది నెలల్లోనే ఎన్నికల మేనిఫెస్టోకు అసలు సిసలు నిర్వచనం ఏమిటో చేతల ద్వారా చూపించారు. దేశంలో ఏ సీఎం చేయని విధంగా ఇచ్చిన మాటకు కట్టుబడే ముఖ్యమంత్రిగా నిలిచారు. ఐదేళ్లు అధికారం ఇచ్చారు కదా అనే గత పాలకుల తరహాకు భిన్నంగా అధికారం చేపట్టిన నాటి నుంచే ఎన్నికల మేనిఫెస్టో ద్వారా ప్రజలకు ఇచ్చిన మాటను నెరవేర్చడమే లక్ష్యంగా ముఖ్యమంత్రి పని చేస్తున్నారు. ఎనిమిది నెలల కాలంలోనే మేనిఫెస్టోలోని సింహ భాగం హామీలను అమలు చేసిన ఘనత సీఎం వైయస్‌ జగన్‌కే దక్కుతుంది. ఈ పథకాలను ప్రజా ఆకర్షక పథకాలుగా చూడకూడదని, ప్రధానంగా వైయస్‌ఆర్‌  రైతు భరోసా, అమ్మ ఒడి పథకాల వెనుక బహుళ ప్రయోజనాలు ఉన్నాయనే అభిప్రాయం సర్వత్రా వ్యక్తం అవుతోంది.

సామాజిక విప్లవానికి నాంది 
దేశానికి అన్నం పెట్టే రైతులకు పంటల పెట్టుబడి కోసం రైతు భరోసా పథకం అమలు చేయడం వ్యవసాయ రంగాన్ని బలోపేతం చేయడమే అవుతుందనే అభిప్రాయం వ్యక్తం అవుతోంది. వైఎస్సార్‌ రైతు భరోసా పథకానికి రైతుల ఎంపిక చాలా పారదర్శకంగా జరిగింది. కుల, మత, రాజకీయాలకు అతీతంగా, ఎక్కడా అవినీతికి తావులేకుండా, నేరుగా 46,50,846 మంది రైతుల ఖాతాలకు నగదు జమ చేశారు. ఎన్నికల మేనిఫెస్టోలో రైతు భరోసాను ఈ ఏడాది ఖరీఫ్‌ నుంచి అమలు చేస్తామని ప్రకటించినప్పటికీ ముఖ్యమంత్రి వైఎస్‌ జగన్‌.. రైతుల ఆర్థిక స్థితిగతులను దృష్టిలో ఉంచుకుని గత ఏడాది నుంచే అమలు చేయడం విశేషం. అమ్మఒడి పథకం అమల్లో సామాజిక కోణం స్పష్టంగా కనిపిస్తోంది.

పేదలు తమ పిల్లలను బడికి పంపించకుండా పనులకు తీసుకెళ్తున్నారు. దీంతో రాష్ట్రంలో అక్షరాస్యత శాతం తక్కువగా ఉంది. దీన్ని దృష్టిలో ఉంచుకుని పేద పిల్లల తల్లిదండ్రులు తమ పిల్లలను పనులకు కాకుండా బడికి పంపించేందుకు అమ్మఒడి పథకం ప్రారంభించారు. తమ పిల్లలను బడికి పంపించే తల్లులకు ఈ పథకం కింద ఏడాదికి రూ.15 వేలు చొప్పున ఇచ్చారు. తద్వారా సంపూర్ణ అక్షరాస్యత సాధించే సామాజిక కోణం ఈ పథకంలో దాగి ఉందనే అభిప్రాయాన్ని అధికార వర్గాలు వ్యక్తం చేస్తున్నాయి. దీన్ని సామాజిక పెట్టుబడిగా చూడాలని కూడా ఆర్థిక వేత్తలు అభిప్రాయపడుతున్నారు. అమ్మఒడికి లబ్ధిదారులను పారదర్శకంగా.. కుల, మత, రాజకీయాలకు అతీతంగా ఎంపిక చేయడమే కాకుండా అవినీతికి ఆస్కారం లేకుండా ఏకంగా 42,01,621 మంది తల్లుల ఖాతాలకు నగదు జమ చేశారు.

లబ్ధిదారుల ఇంటి వద్దకే పెన్షన్‌..
వైయస్‌ఆర్‌ పెన్షన్‌ కానుక ద్వారా పెన్షన్‌ పెంపును దేశ చరిత్రలో ఎక్కడా లేని విధంగా ఈ నెల 1వ తేదీన ఉదయం నుంచి మధ్యాహ్నంలోగా వృద్ధులు, వికలాంగులు, వితంతువులు, తదితర లబ్ధిదారుల ఇళ్ల వద్దే వలంటీర్ల ద్వారా పంపిణీ చేశారు. ఎక్కడా అవినీతికి ఆస్కారం లేకుండా ఈ కార్యక్రమం విజయవంతమైంది. పెన్షన్‌ పెంపు పథకం ద్వారా 54,65,564 మంది చేతులకు నేరుగా రూ.1,320.14 కోట్లు ఇచ్చారు. సముద్రంలో చేపల వేట నిషేధ సమయంలో మత్స్యకారులకు పది వేల రూపాయల చొప్పున ఆర్థిక సాయం చేశారు. లంచాలు, అవినీతికి ఎక్కడా ఆస్కారం లేకుండా 1,02,388 మంది మత్య్సకారుల ఖాతాలకు నేరుగా నగదు జమ చేశారు. అలాగే చేనేత కార్మికులకు 24 వేల రూపాయల చొప్పున 81,783 మంది ఖాతాలకు నగదు జమ చేశారు. ఇచ్చిన మాట మేరకు అగ్రి గోల్డ్‌ బాధితులకు తొలి దశలో పది వేల రూపాయల డిపాజిట్‌ దారులైన 3,34,160 కుటుంబాలకు నేరుగా బ్యాంకు ఖాతాల్లో నగదు జమ చేశారు. రాష్ట్ర పర్యటనకు వచ్చిన 15వ ఆర్థిక సంఘం చైర్మన్‌ ఎన్‌.కె.సింగ్‌ రాష్ట్ర ప్రభుత్వం అమలు చేస్తున్న పథకాలను ప్రశంసించారు. ఈ పథకాలను సామాజిక పెట్టుబడిగా చూడాల్సి ఉంటుందని వ్యాఖ్యానించడం విశేషం.
 

Back to Top