ఎన్నికల స్టంట్లు ఈ క్యాంటీన్లు

అన్నకాంటీన్ల నిర్మాణ ఆకృతులపై ప్రజాభిప్రాయ సేకరణ అంటూ ప్రభుత్వం 18 నమూనాలను పెట్టి ఓటింగ్ చేయమంది. ఒక్కోటీ ఎన్టీఆర్, చంద్రబాబు భారీ ఫొటోలతో చిన్నపాటి విల్లాలా ఉన్న ఆ డిజైన్లు చూసి ఎవరైనా విస్తు పోవాల్సిందే. పచ్చటి గ్రీన్ గార్డెన్, విశాలమైన ఎంట్రన్స్, అద్దాల తలుపులు, ఖరీదైన ఇంటిని తలపించే బిల్డింగ్...ఇలాంటి నమూనాతో కొన్ని డిజైన్లు చేసి ముందుంచారు. చెప్పండి మీకు ఎలాంటి అన్నా క్యాంటీన్ కావాలో అని ప్రకటించారు. అందులో ఏది సెలక్టయ్యిందో తెలియదు కానీ, ఇంత వరకూ ఏర్పాటు చేసిన అన్నా క్యాంటీన్లేవీ అలామాత్రం లేవు. అమరావతిలో సచివాలయానికి చేరువలో ఏర్పాటు చేసిన అన్న క్యాంటీన్ ఓ చిన్న షెడ్డులో ఉంది. కనీసం ఆ చుట్టుపక్కల కూలిపనులు చేసుకునే వాళ్లు కూడా వచ్చి అక్కడ భోజనం తినడం లేదట. దాంతో ఎప్పుడు చూసినా ఆ క్యాంటీన్ మూతేసే ఉంటుంది. ఇప్పుడు చంద్రబాబుగారు అన్న క్యాంటీన్లమీద దృష్టిపెట్టారు. ఏమయ్యిందో ఏమో కానీ చంద్రన్న క్యాంటీన్లు అని మాత్రం అనలేదు. ఈ నెల 11 నుంచి అన్న క్యాంటీన్లు అందుబాటులోకి వస్తాయని చెబుతున్నారు. 13 జిల్లాల్లో మొదటి విడతగా 100 క్యాంటీన్లు ఏర్పాటు చేస్తారట. ఎన్నికల వేళ దగ్గర పడితే గాని పేదలకు ఆహార భద్రత సంగతి గుర్తు రాలేదు చంద్రబాబుకు. ఎన్నికల ముందు ఇచ్చిన అన్న కాంటీన్ల హామీని ఇప్పుడు లైన్లోకి తెచ్చాడు. నిజానికి ఈ పథకం తమిళనాడులో జయలలిత అమ్మ కాంటీన్ల నుంచి స్ఫూర్తి పొందింది. బాబు స్ఫూర్తి నిజమైనదైతే ఈ పాటికే రాష్ట్రమంతా అన్న క్యాంటీన్లు పని చేస్తూ ఉండాలి. కానీ బాబు లెక్కలే వేరు గదా! గతంలో ఆ పార్టీకే చెందిన ఎమ్మెల్సీ ఎంవీవీఎస్ మూర్తీ శాసన మండలిలో ప్రశ్నోత్తరాల సమయంలో దీనిపై ప్రశ్నించారు. ఎన్నాళ్లుగానో అన్నా కాంటీన్లను నిర్లక్ష్యం చేస్తున్నారని అడిగినా ప్రభుత్వం సమాధానం చెప్పలేదు.