బాబు‌కు ఇక అధికారం కల్ల: మారెప్ప

హైదరాబాద్, 9 మార్చి 2013: చంద్రబాబుకు మళ్లీ అధికారం అందడం కల్ల అని వైయస్‌ఆర్ కాంగ్రె‌స్ పార్టీ ‌కేంద్ర పాలక మండలి సభ్యుడు, మాజీ మంత్రి మూలింటి మారెప్ప విరుచుకుపడ్డారు. వరుసగా 2004, 2009లో చంద్రబాబుకు రాష్ట్ర ప్రజలు సరైన బుద్ధి చెప్పారు. 2014లో జరిగే ఎన్నికల్లో కూడా ఆయనకు గుణపాఠం చెప్పడం తథ్యం అన్నారు. అధికారంలోకి రావాలన్న కోరికతో విశ్వసనీయతకు, నైతిక విలువలకు తిలోదకాలిచ్చి మహానేత వైయస్‌ కుటుంబంపైన గోబెల్సు ప్రచారం చేస్తున్నారని నిప్పులు చెరిగారు. పార్టీ కేంద్ర కార్యాలయంలో శనివారం సాయంత్రం నిర్వహించిన మీడియా సమావేశంలో ఆయన మాట్లాడారు.‌ బ్రదర్ అనిల్‌ కుమార్‌ గురించి టిడిపిలోని పైరవీకారుల బృందం అసత్య ప్రచారం చేస్తున్నదని దుయ్యబట్టారు. తొమ్మిదేళ్ళ పాలనలో చంద్రబాబు మన రాష్ట్రాన్ని సర్వనాశనం చేశారని విమర్శించారు.

చంద్రబాబు బతుకంతా హత్యా రాజకీయాలు,
వెన్నుపోట్లు, కుట్రలు, కుతంత్రాలేనని మారెప్ప విమర్శించారు. మామ ఎన్టీ
రామారావును స్లో పాయిజన్ ద్వారా అంతం చేశారని తీవ్రమైన ఆరోపణ చేశారు. నిత్యం మహానేత వైయస్‌ఆర్ కుటుంబాన్ని నిందించడం, ఆడిపోసుకోవడం తప్ప ప్రజల కోసం ఏనాడైనా ఒక్క
మంచిపని చేశావా అని ప్రశ్నించారు. చెప్పుకోవటానికి ఏమీలేక నిత్యం వైయస్‌ఆర్ కుటుంబంపై బురద చల్లడమే పనిగా పెట్టుకున్నారని చంద్రబాబుపై తీవ్రంగా
ధ్వజమెత్తారు. చంద్రబాబు కొడుకు లోకేష్ చదువుకు సత్యం రామలింగరాజు రూ. 85
కోట్లు వెచ్చించిన మాట వాస్తవం కాదా? అని ప్రశ్నించారు.రెండెకరాల పొలం
నుంచి వచ్చిన చంద్రబాబుకు దేశవిదేశాల్లో వేల కోట్ల ఆస్తులు ఎక్కడి నుంచి
వచ్చాయో బహిరంగ చర్చకు సిద్ధపడాలని మారెప్ప సవాలు విసిరారు.