గల్లీ నుంచి ఢిల్లీ దాకా హోదా పోరు

విజయవాడ :  ప్రత్యేక హోదా సాధన కోసం పదవులను త్యజించి, ఆమరణదీక్ష చేస్తున్న ఎంపిలకు సంఘీభావంగా రాష్ట్ర వ్యాప్తంగా పలు కార్యక్రమాలు హోరెత్తుతున్నాయి. మూడు రోజులుగా దీక్షలో ఉన్న వారి లక్ష్యం నెరవేరాలని, రాష్ట్రానికి ప్రత్యేక హోదా ప్రకటించాలని డిమాండ్ చేస్తూ పలు రకాలుగా నిరసన కార్యక్రమాలను చేపట్టారు. ప్రతి వాడలోనూ ప్రత్యేక హోదా ఆంధ్రుల హక్కు అనే నినాదం మారు మోగుతోంది. హోదా సాధించేంత వరకు పోరాటం ఆపేది లేదంటూ ప్రజలు పెద్ద ఎత్తున ఆందోళనలు చేస్తున్నారు. పలు జిల్లా కలెక్టరేట్ల వద్ద వంటావార్పు నిర్వహించి తమ నిరసనను వ్యక్తపరిచారు. ఈ నిరసన కార్యక్రమాల్లో ఆయా జిల్లాల ఎమ్మెల్యేలు, ఎమ్మెల్సీలు, నియోజకవర్గాల ఇన్ ఛార్జిలు, వైయస్ ఆర్ సిపి అనుబంధ విభాగాల నాయకులు, అభిమానులు, ప్రజలు పెద్ద ఎత్తున పాల్గొంటూ హోదా కావాలంటూ ఎలుగెత్తి డిమాండ్ చేస్తున్నారు. గల్లీ నుంచి ఢిల్లీ దాకా హోదా పోరు రోజురోజుకు ఉధృతమవుతోంది.