రాష్ట్ర ప్రభుత్వంపై నమ్మకం పోయింది: గడికోట

రాష్ట్రంలో అత్యధిక సహకార సంఘాల ఎన్నికల్లో గెలిచామని, ప్రజలు తమ పక్షాన ఉన్నారని గొప్పలు చెప్పుకుంటున్న ముఖ్యమంత్రి, పిసిసి అధ్యక్షుడు కడప సంఘటనతో సిగ్గుతో తలవంచుకోవాలని శ్రీకాంత్‌రెడ్డి దుయ్యబట్టారు. కాంగ్రెస్‌ పార్టీ వారు ఎంత అప్రజాస్వామిక విధానాలు అవలంబించి సహకార సంఘాల ఎన్నికల్లో గెలిచారన్నది స్పష్టంగా వెల్లడయిందన్నారు. కడప డిసిసిబి సభ్యుల్లో మెజారిటీ వైయస్‌ఆర్‌సిపికి ఉన్నప్పటికీ ఎన్నిక నిర్వహించాల్సిన అధికారిని కిడ్నాప్‌ చేయించడం అంటే సిగ్గులేని చర్యలే అని ఆరోపించారు. మెజారిటీ లేనప్పుడు కాంగ్రెస్‌ వారు ఎందుకు వచ్చారో, బలప్రదర్శన చేయడం ఎందుకో, అధికారిని ఎందుకు కిడ్నాప్‌ చేశారో, ఇన్ని రకాలుగా ప్రజాస్వామ్యాన్ని ఖూనీ చేస్తున్నప్పుడు వారిపై ప్రజలకు నమ్మకం ఎలా ఉంటుందని నిలదీశారు. జిల్లాలో కాంగ్రెస్‌ పార్టీ నాయకులు దౌర్జన్యాలకు పరాకాష్ట అని శ్రీకాంత్‌రెడ్డి అభివర్ణించారు. కాంగ్రెస్‌ దౌర్జన్యాలను తాము అడ్డుకోగలిగాం కాబట్టే తమ పార్టీకి మెజారిటీ స్థానాలు దక్కాయన్నారు.