బహిష్కరణ పేరుతో కాంగ్రెస్‌ పార్టీ డ్రామాలు

హైదరాబాద్:

ఆరుగురు ఎంపీల బహిష్కరణ పేరుతో కాంగ్రెస్‌ పార్టీ ఢిల్లీలో సరికొత్త డ్రామాకు తెరతీసిదని వైయస్ఆర్ కాంగ్రె‌స్ పార్టీ అధికార ప్రతినిధి గట్టు రామచంద్రరావు దుయ్యబట్టారు.‌ రాష్ట్ర విభజన బిల్లును వ్యతిరేకిస్తున్నందున ఆ ఎంపీలను బహిష్కరిస్తున్నట్లు చెబుతున్న కాంగ్రెస్ అసెంబ్లీలో అదే బిల్లును వ్యతిరేకించిన ఎమ్మెల్యేలను, ఢిల్లీలో ధర్నా చేసిన సీఎం కిర‌ణ్‌కుమార్‌రెడ్డి, పీసీసీ అధ్యక్షుడు బొత్స సత్యనారాయణలను ఎందుకు బహిష్కరించలేదని ప్రశ్నించారు. బహిష్కరణకు గురైన ఆరుగురు ఎంపీలు కూడా సోనియాగాంధీ ఆడిస్తున్న డ్రామాలో భాగంగానే ఇన్నాళ్లూ అవిశ్వాసం, ధర్నాలు అంటూ రకరకాల ఫీట్లు చేస్తున్నారని విమర్శించారు. పార్టీ కేంద్ర కార్యాలయంలో మంగళవారం ఆయన విలేకరుల సమావేశంలో మాట్లాడారు.

బిల్లును వ్యతిరేకిస్తున్నందువల్లే ఆ ఆరుగురిపై బహిష్కరణ వేటు వేశారంటే మిగతా సీమాంధ్ర ఎంపీలు, కేంద్ర మంత్రులు తెలంగాణకు అనుకూలమా? అని రామచంద్రరావు ప్రశ్నించారు. మైనారిటీలో ఉన్న యూపీఏ ప్రభుత్వానికి మెజారిటీ నిర్ణయాలు తీసుకునే అర్హత ఎక్కడ ఉందని ఆయన నిలదీశారు.
‌'పార్లమెంటులో రాష్ట్ర విభజన బిల్లు ఆమోదం కోసం కాంగ్రెస్ ప్రభుత్వం విపక్షాలకు విందులు ఏర్పాటు చేస్తోంది. ప్రతిష్టాత్మకమైన మహిళాబిల్లు, చట్టసభల్లో బీసీలకు రిజర్వేషన్లకు సంబంధించిన తదితర అనేక బిల్లులు పెండింగ్‌లో ఉన్నాయి. వీటి ఆమోదం కోసం ఏనాడూ విపక్షాల మద్దతు కూడగట్టని కాంగ్రెస్‌ పార్టీ తెలుగుజాతిని చీల్చడం కోసం విందులు ఏర్పాటు చేస్తోంది. తెలుగుజాతిపై ఎందుకింత కక్షగట్టారు? ఏం పాపం చేసిందని ఇంత దుర్మార్గంగా వ్యవహరిస్తున్నార'ని గట్టు విమర్శించారు.

‌'ఆంధ్రప్రదేశ్‌ రాష్ట్ర విభజన బిల్లుకు పార్లమెంటులో ఎలాంటి న్యాయ సమస్యలు ఎదురు కాకూడదనే పక్కా ప్రణాళికతో సీఎం కిరణ్, ప్రతిపక్షనేత చంద్రబాబు చేత అసెంబ్లీలో చర్చ జరిగేలా చేసి నాటకీయంగా పంపించారు. రాష్ట్రాన్ని విభజించడం కోసం కాంగ్రెస్‌ పార్టీ చేస్తున్న డ్రామాలన్నింటికీ టీడీపీ వంత పాడుతోంది. కాంగ్రెస్ మాదిరిగానే చంద్రబాబు కూడా ఇరు ప్రాంత నేతల చేత డ్రామాను రక్తి కట్టిస్తున్నారు. ఓట్లు, సీట్ల కోసం సిగ్గుమాలిన పనికి ఒడిగడుతున్నా'రని గట్టు ఆరోపించారు.

జాతీయ నేతలను చంద్రబాబు ఎందుకు కలుస్తున్నారో చెప్పడంలేదని, విహారయాత్ర చేస్తున్నట్లుగా చంద్రబాబు నాయుడు పర్యటిస్తున్నారని, రాష్ట్రాన్ని ఇష్టానుసారంగా విభజించడానికి సోనియాగాంధీ, చంద్రబాబు, కేసీఆర్‌ల అబ్బ జాగీరు కాదని గట్టు గుర్తుచేశారు.