ఆంధ్రలో ప్రజాస్వామ్య విలువలకు పాతర

వైయస్‌ఆర్‌ జిల్లా: ఆఫ్ఘనిస్తాన్‌లోనైనా కొద్దోగొప్పో ప్రజాస్వామ్యం ఉంటుందేమో కానీ ఆంధ్రప్రదేశ్‌ రాష్ట్రంలో మాత్రం ప్రజాస్వామ్యం లేదని వైయస్‌ఆర్‌ సీపీ ఎమ్మెల్యే గడికోట శ్రీకాంత్‌రెడ్డి విమర్శించారు. వైయస్‌ఆర్‌ జిల్లా స్థానిక సంస్థల ఎమ్మెల్సీ ఎన్నికలకు మెజార్టీ లేకపోయినా చంద్రబాబు పార్టీ అభ్యర్థిని నిలబెట్టి క్యాంపు రాజకీయాలకు పాల్పడుతోందని ధ్వజమెత్తారు. వైయస్‌ఆర్‌ కాంగ్రెస్‌ పార్టీ ప్రజాప్రతినిధులను బెదిరింపులకు గురిచేస్తూ, అక్రమంగా కేసులు బనాయిస్తూ, కిడ్నాప్‌లు చేస్తూ విచ్చల విడిగా ప్రలోభాలకు గురిచేస్తున్నారని మండిపడ్డారు. చంద్రబాబు పార్టీ ఎన్ని ప్రలోభాలు పెట్టినా లొంగకుండా వైయస్‌ఆర్‌ సీపీకి అండగా నిలిచారన్నారు. వారందరికీ ఎమ్మెల్యే శ్రీకాంత్‌రెడ్డి కృతజ్ఞతలు తెలిపారు. పోలీసులు కూడా అధికార పార్టీకి మద్దతుగా నిలుస్తున్నారని ఆగ్రహం వ్యక్తం చేశారు.