చంద్రబాబుది అంతా మోసం..దగా..!

ఇడుపులపాయ: ఓటుకి కోట్లు కేసులో ముఖ్యమంత్రి స్థాయి వ్యక్తి స్వయంగా పట్టుబడటం దేశ చరిత్రలో ఎప్పుడూ జరగలేదని ప్రతిపక్ష నేత, వైయస్సార్సీపీ అధ్యక్షులు వైయస్ జగన్ అభిప్రాయ పడ్డారు. దొరికిపోయిన తర్వాత కూడా చంద్రబాబు అరెస్టు కాకపోవటం విడ్డూరంగా ఉందని పేర్కొన్నారు. . వైయస్సార్ జిల్లా ఇడుపులపాయలో  పంట పొలాల్లో  సాగు తీరుని వైయస్ జగన్ పరిశీలించారు. అనంతరం ఆయన మీడియాతో మాట్లాడారు.

చంద్రబాబుకి ఉన్న అధికారాలు, పరిచయాలను ఉపయోగించుకుని తప్పించుకుంటున్నారని ఆరోపించారు.   కేసుల మాఫీ గురించి సుజనా చౌదరిని ఢిల్లీకి పంపారని అన్నారు. చంద్రబాబు పాత్రపై విచారణకు ప్రత్యేక కోర్టు ఆదేశించిన వెంటనే సుజనా చౌదరి పరుగున వెళ్లి అరుణ్ జైట్లీ,వెంకయ్య నాయుడు, అమిత్ షాలను కలిశారని గుర్తు చేశారు. హైదరాబాద్ వచ్చి గవర్నర్ తో భేటీ అయ్యారని వెల్లడించారు. ప్రత్యేకహోదా గురించి కలిసామంటూ జనం చెవుల్లో పూలు పెడుతున్నారని ధ్వజమెత్తారు. ప్రత్యేక హోదాకు, గవర్నర్ కు సంబంధం ఉందా అని వైయస్ జగన్ ప్రశ్నించారు.

 ఓటుకు కోట్లు కేసులో పూర్తిగా కూరుకుపోయిన చంద్రబాబు .... ఈ కేసు నుంచి బయట పడేందుకు పాలనను గాలికొదిలేశారని మండిపడ్డారు.  స్వప్రయోజనాల కోసం రాష్ట్రాన్ని తాకట్టు పెట్టారని విమర్శించారు.  చంద్రబాబు పాలన అంతా మోసం, అబద్ధం అని వ్యాఖ్యానించారు. డబ్బు సంపాదన, కేసుల నుంచి ఎలా బయటపడాలనే దాని గురించే చంద్రబాబు ఆలోచిస్తుంటారని అన్నారు.

రైతులపై చంద్రబాబుకు ఏమాత్రం ప్రేమ లేదని వైయస్ జగన్ అన్నారు. 2013-14లో రైతులకు ఇన్​‑ఫుట్ సబ్సిడీ ఎగ్గొట్టారని చెప్పారు. 2014-15లో కలెక్టర్లు ఇచ్చిన నివేదికలను కుదించి రూ.600 కోట్లే ఇచ్చారని తెలిపారు. 11 ఏళ్ల క్రితమే రెయిన్ గన్లు వాడుకలోకి వచ్చాయన్నారు. నీళ్లు లేకుండా రెయిన్‑గన్లతో ఏం ఉపయోగమని ప్రశ్నించారు. శ్రీశైలం నుంచి నీళ్లు అందించాల్సిన బాధ్యత సీఎం చంద్రబాబుపై ఉందన్నారు. పులిచింతల ప్రాజెక్టులో 45 టీఎంసీల నీళ్లకు అవకాశమున్నా కేవలం 15 టీఎంసీలే ఉంచుతున్నారని ఆవేదన వ్యక్తం చేశారు. కృష్ణా, గోదావరి డెల్టాలు, రాయలసీమ కరువుతో అల్లాడుతున్నా పట్టించుకోవడం లేదని దుయ్యబట్టారు. అన్నదాతలకు అండగా నిలవాలని వైయస్ ప్రభుత్వాన్ని జగన్ డిమాండ్ చేశారు.

Back to Top