మహిళా ఎమ్మెల్యేలపై దాడి అమానుషం

ఏపీ సీఎం చంద్రబాబుకు రాష్ట్ర ప్రజల ప్రయోజనాలు పట్టడం లేదని, ఆయనకు తనపై ఉన్న కేసులు ఎలా మాఫీ చేయించుకోవాలి, తన కొడుకు లోకేష్‌కు సూటుకేసులు ఎలా ఇప్పించాలన్నదే ముఖ్యమని వైయస్‌ఆర్‌ కాంగ్రెస్‌ పార్టీ ఎమ్మెల్యే చెవిరెడ్డి భాస్కర్‌రెడ్డి ఎద్దేవా చేశారు. హోదా విషయంలో ఎలాంటి తప్పు చేయనప్పుడు అర్ధరాత్రి వేళ ఎందుకు ప్రకటన ఇప్పించారని సీఎంను ప్రశ్నించారు. ప్రజలంతా హోదా కోసం రోడ్డెక్కి బంద్‌ పాటిస్తుంటే..ప్రభుత్వం రాష్ట్రాన్ని పోలీసు వలయం చేసిందని విమర్శించారు. బంద్‌ చేస్తుంది ప్రజలా? పోలీసులా అన్న అనుమానం కలుగుతుందన్నారు. బంద్‌ను నిర్వీర్యం చేసేందుకు చంద్రబాబు కుట్ర పన్నారని, అందులో భాగంగానే వైయస్‌ఆర్‌సీపీ నేతలను బలవంతంగా అరెస్టు చేశారని ఆగ్రహం వ్యక్తం చేశారు. హోదా కోసం ముందుండి పోరాడాల్సిన సీఎం ఇలా అడ్డుతగలడం దుర్మార్గమన్నారు. హోదా విషయంపై అసెంబ్లీలో చర్చించాలని ప్రతిపక్షం పట్టుబడితే సభను వాయిదా వేసి తప్పించుకున్నారని ధ్వజమెత్తారు. కనీసం మీడియా పాయింట్‌లో మాట్లాడుదామని అనుకుంటే టీడీపీ ఎమ్మెల్యేలు అడ్డుపడి వైయస్‌ఆర్‌సీపీ గిరిజన మహిళా ఎమ్మెల్యేలను అవమానిస్తున్నారని ఆవేదన వ్యక్తం చేశారు. చంద్రబాబు ఆదేశాల మేరకే ఎమ్మెల్యేలు వీరంగం సృష్టిస్తున్నారని మండిపడ్డారు. మహిళలకు అండగా నిలబడిన తనను పోలీసులు బలవంతంగా లాక్కెళ్లడం దారుణమన్నారు. అసెంబ్లీ ఏమైన ఎన్‌టీఆర్‌ ట్రస్ట్‌ భవన్‌ అనుకుంటున్నారా? అని ప్రశ్నించారు. చంద్రబాబుకు రోజులు దగ్గరపడ్డాయని చెవిరెడ్డి భాస్కర్‌రెడ్డి హెచ్చరించారు.

ప్రత్యేక హోదా కోసం వైయస్‌ఆర్‌ కాంగ్రెస్‌ పార్టీ రెండేళ్లుగా ధర్నాలు, రాస్తారోకోలు, బంద్‌లు చేపట్టిందని, ఇంకా ఎలా పోరాడాలో జనసేన అధినేత పవన్‌ కళ్యాణ్‌ చెప్పాలని ఎమ్మెల్యే గడికోట శ్రీకాంత్‌రెడ్డి ప్రశ్నించారు. హోదా కోసం రాష్ట్ర ప్రజలంతా బంద్‌లో పాల్గొంటుంటే పవన్‌ మాతో సహకరించకుండా తమ పంథాను తప్పుపట్టడం దారుణమన్నారు. హోదా విషయంలో కేంద్రం తీవ్ర అన్యాయం చేస్తుంటే అసెంబ్లీలో ఈ అంశంపై చర్చకు చంద్రబాబు అంగీకరించకుండా ముందుగా స్టేట్‌మెంట్‌ ఇస్తామని మొండిగా వ్యవహరించడం సరికాదన్నారు. కేంద్ర మంత్రి ప్రకటన చేశాక స్వాగతించిన సీఎం ఇంకా ఎన్నిసార్లు స్టేట్‌మెంట్లు ఇస్తారని ప్రశ్నించారు. గతంలో రాజధాని భూ దురాక్రమణ విషయంలో కూడా ఇలాగే స్టేట్‌మెంట్‌ ఇచ్చి సభ నుంచి టీడీపీ పారిపోయిందని గుర్తు చేశారు. హైకోర్టు ఏర్పాటు కోసం విజయవాడలో 32 ఎకరాలు కేటాయించామని 2014 సెప్టెంబర్‌లో తీర్మానం చేసినట్లు చంద్రబాబు అబద్దాలు చెబుతున్నారని ఫైర్‌ అయ్యారు. కడపలో స్టీల్‌ ప్లాంట్, విశాఖకు ప్రత్యేక రైల్వే జోన్‌ ఏర్పాటు చేయాలని శ్రీకాంత్‌రెడ్డి డిమాండ్‌ చేశారు.

కేంద్రం ప్రకటించిన ప్యాకేజీని క్యాష్‌ చేసుకునేందుకు చంద్రబాబు కుట్ర పన్నుతున్నారని ఎమ్మెల్యే ఉప్పులేటి కల్పన ఆరోపించారు. హోదాతోనే రాష్ట్రాభివృద్ధి సాధ్యమవుతుందని అందరు భావిస్తుంటే సీఎం మాత్రం ప్యాకేజీకి స్వాగతించడం బాధాకరమన్నారు. హోదా అంశంపై అసెంబ్లీలో చర్చంచేందుకు ప్రతిపక్షానికి మైక్‌ ఇవ్వకుండా గొంతునొక్కారని, మీడియా పాయింట్‌లో మాట్లాడాలనుకుంటే టీడీపీ ఎమ్మెల్యేలు అడ్డుకోవడం దుర్మార్గమన్నారు. మహిళా ఎమ్మెల్యేలను కించపరిచేలా అధికార పార్టీ నేతలు వ్యవహరించడం సరికాదన్నారు. అసెంబ్లీలో ఎలాంటి గొడవ లేకుండా నిరసన తెలుపుతుంటే మార్షల్స్‌తో నెట్టించి అవమానపరిచారని ఆవేదన వ్యక్తం చేశారు. హోదా కోసం బంద్‌కు పిలుపునిస్తే దాన్ని నిర్వీర్యం చేసేందుకు చంద్రబాబు పోలీసులకు హుకుం జారీ చేశారని తెలిపారు. వైయస్‌ఆర్‌సీపీ నేతలను ముందస్తుగా హౌస్‌ అరెస్టులు చేయడం అన్యాయమన్నారు. పోలీసుల ద్వారా ఉద్యమాన్ని అణచాలనుకుంటే ఆగదని చంద్రబాబును హెచ్చరించారు. అసెంబ్లీ నుంచి పారిపోయిన టీడీపీ నేతలను ప్రజలు కూడా తరమికొట్టే రోజులు దగ్గర్లోనే ఉన్నాయని హెచ్చరించారు.

చట్టసభల్లో గిరిజన మహిళలకు మాట్లాడే హక్కు లేదా అని వైయస్‌ఆర్‌సీపీ ఎమ్మెల్యే గిడ్డి ఈశ్వరి ప్రశ్నించారు. రాష్ట్రానికి తీవ్ర అన్యాయం జరుగుతుంటే, గిరిజనుల సమస్యలు అపరిష్కృతంగా ఉంటే వాటిపై మాట్లాడేందుకు అసెంబ్లీకి వచ్చిన మాకు ప్రభుత్వం సభలో మాట్లాడేందుకు అవకాశం కల్పించకుండా అవమానించిందని ఆమె ఆవేదన వ్యక్తం చేశారు. కనీసం మీడియా పాయింట్‌లోనైనా మా బాధలు చెప్పుకుందామనుకుంటే ఇక్కడ కూడా టీడీపీ ఎమ్మెల్యేలు అడ్డుపడి దాడికి పాల్పడుతున్నారని ఆందోళన వ్యక్తం చేశారు.