వైదిస్ కోలావెర్రి కట్టప్పా?

అమరావతి దేవతల రాజధాని. మామూలు ప్రజలది కాదు. స్వర్గాన్ని తలదన్నే ఆ అమరావతి నిజంగా ఉందో లేదో చూసివచ్చిన వాళ్లు లేరు. పురాణాల్లో, వేదాల్లో, జానపదగాథల్లో, కాల్పనిక సాహిత్యంలో మాత్రం అమరావతి వైభవాన్ని వేనోళ్ల పొగిడారు. 

                    ఆంధ్రప్రదేశ్ ముఖ్యమంత్రి చంద్రబాబు కూడా కొత్త రాజధాని ఇంద్రుడి అమరావతి కంటే రెండు ఫ్లోర్లు ఎక్కువే ఉండాలనుకుంటున్నాడు.ఆశలకు హద్దు లేదు. కోరికకు కళ్లాలు లేవు. డిజైన్ ల కోసం తిరగని దేశాలు లేవు. కానీ, కట్టడానికే డబ్బులు లేవు. బాబు ఎక్కి, దిగే విమానాలు కాఫీ, టీ, టిఫిన్ చిల్లర ఖర్చులకు పోగా మిగిలింది డిజైన్ లు ఇచ్చిన సింగపూర్ కో, వాటిని సవరించిన గ్రాఫిక్ డిజైనర్ కో సరిపోయింది. 

          మహామహాదేశాలే అబ్బురపడే గొప్ప భారతీయ ఆర్కిటెక్చర్ నిపుణులు బాబు కళ్లకు కనబడలేదు. సింగపూర్, జపాన్, కొరియా, చైనా, జర్మనీ నగరాలంటూ రెండున్నరేళ్ల పుణ్యకాలమంతా చూసి రావడానికే సరిపోయింది. రాజధాని కోసం భూములు అర్పించుకున్న రైతుల్లో కూడా అసహనం, ఆవేదన పెరుగుతోంది. వెలగపూడి, ఉద్దండరాయునిపాలెంలో తాత్కాలికం, సెమీ తాత్కాలికం, తాత్కాలికం కమ్ పర్మినెంట్ అంటూ కట్టిన సచివాలయం ఎంత చక్కగా ఉందో రాస్తే రామాయణం, చెప్పే మహాభారతం. 
                          
                  ప్రపంచదేశాలన్నీ తిరిగి ప్రపంచ అత్యుత్తమ అయిదు నగరాల్లో అమరావతి ఒకటి అవుతుందని బాబు అంటుంటే అందరూ నవ్వుతున్నారు గానీ ఆయన నిజమే చెప్పారు. కాకపోతే ఆయన చెప్పింది గ్రాఫిక్స్, యానిమేషన్ తో నిర్మించే త్రీడీ అమరావతి. అది చూడ్డానికే-ఉండడానికి కాదు.

                        ఇన్నాళ్లు అస్పష్టంగా ఉన్న అమరావతి నిర్మాణంలో ఇప్పుడే క్లారిటీ వచ్చింది. బాహుబలిలో గ్రాఫిక్ తోటలు, కోటలు బాగా కట్టిన దర్శకుడు రాజమౌళిని ఆంధ్రప్రదేశ్ ప్రభుత్వం రాజధాని నిర్మాణానికి సాయం అడిగిందట. ఆయన బాహుబలి రెండో భాగం పనికాగానే, అమరావతి పని పడతానని హామీ ఇచ్చారట. 
                                                                       వాట్ యూ ఆర్ సేయింగ్?
                                                                       వేర్ వుయ్ ఆర్ గోయింగ్?
                                                                       వైదిస్ కోలావెర్రి కట్టప్పా? 

తాజా ఫోటోలు

Back to Top