2014 మే నెలలో ఎన్నికలు జరుగుతూ వుండగా సుబ్బారావు కోమాలోకి వెళ్ళిపోయారు. చంద్రబాబు వాగ్దానాలు వినివిని కళ్ళు తిరిగి ఆయన ఆస్పత్రి పాలయ్యారు.
2016 లో కోమా నుంచి కోలుకున్నాడు.
`` రెండేళ్ళ తరవాత మళ్ళీ మామూలు మనిషియ్యారు`` అన్నాడు డాక్టర్
``రెండేళ్ళా ! అయితే ఆంధ్రప్రదేశ్ లో అద్భుతాలు జరిగిపోయి ఉంటాయి. ఇవన్నీ చూసే భాగ్యం నాకు లేకుండా పోయింది డాక్టర్ ``అని సుబ్బారావు బోరున ఏడవసాగాడు.
`` మీరెందుకు ఏడుస్తున్నారో నాకు తెలియదు. కానీ బయటికేలితే మీకు చాలా అద్భుతాలు కనిపిస్తాయి `` అని డాక్టర్ డిశ్చార్జ్ చేసి పంపాడు.
విజయవాడ నడిబొడ్డున సుబ్బారావు నిలబడగానే ఒక యువకుడు ఎదురయ్యాడు `` బాబోస్తే జాబోస్తుందన్నారు. వచ్చిందా బాబూ? `` అని ఆ కుర్రాన్ని అడిగాడు సుబ్బారావు.
``బాబేంటి? జాబేంటి ?`` అని ఆ కుర్రాడు భయంగా అడిగాడు.
`` చంద్రబాబు వస్తే అందరికీ ఉద్యోగాలు వస్తాయన్నారు కదా? ``
`` ఆయనకీ ముఖ్యమంత్రి ఉద్యోగం వచ్చింది. మాకెవరికీ జాబు రాలేదు, జవాబూ రాలేదు `` అని వెళ్ళిపోయాడా కుర్రాడు.
ఇంతలో ఒక బక్కచిక్కిన రైతు కనిపించాడు.
`` రైతన్నా, నీ రుణాలు మాఫీ అయ్యాయా ? నీ పంట పండిందా ? అని అడిగాడు.
``పంట ఏందీ, ఇంట్లో వంట కూడా లేకుండా పోయింది. అందుకే వలస పోతున్నాం``
``అదేంటి పరాయి రాష్ట్రాల నుంచి ఇంజనీర్లు, డాక్టర్లు మన అభివృద్ధిని చూసి వలస వస్తారనుకుంటే మీరే వలస వెలుతున్నారా?``
`` అభివృద్ధి అంటే నాయకుల అభివృద్దే కానీ, ప్రజల అభివృద్ధి కాదు బాబూ``
`` ఇంతకూ రాజధాని ఎక్కడ కడుతున్నారు?``
`` అమరావతిలో ``
`` ఈ రెండేళ్ళ లో కట్టేశారా ?``
`` రైతుల భూములన్నీ కొట్టేశారు ``
``మరి ఈ రెండేళ్లలో ఏం చేశారు ?``
``3 డి సినిమా చూపించారు ``
`` అంటే ?``
`` తెలుగుదేశం అద్దాలు పెట్టుకున్నవారికి అభివృద్ధి కళ్ళముందు ఎగురుతూ వుంటుంది. అద్దాలు లేని వాళ్లకి అంతా మసకే `` అని రైతు వెళ్ళిపోయాడు.
సుబ్బారావు గందరగోళంగా వెళుతుంటే ఒక కార్మికుడు కనిపించాడు .
``ఏమయ్యా, పరిశ్రమల‌ల్నీ తరలి వచ్చాయా ? `` అని అడిగాడు
`` పరిశ్రమలంటే ఏంటది ?`` అని బుర్రగోక్కుంటూ అడిగాడు కార్మికుడు
``అదేంటి, చంద్రబాబు అధికారంలోకి వస్తే వందలు వేల పరిశ్రమలు వస్తాయన్నారు. ``
`` రాష్ట్రానికి ఏ మోచ్చాయో తెలియదు కానీ, మాకు మాత్రం పోయే కాలం వచ్చిందండి. పనిలేదు, తిండి లేదు ``
`` ఇంతకూ ప్రత్యేక హోదా వచ్చిందా లేదా ? ``
`` హోదానా? అంటే ఏంటండి ? సాదా పాన్ తెలుసు కానీ ఈ హోదా అంటే ఏంటో తెలియదండి ``
చదువులేని వాళ్ళతో మాట్లాడి లాభం లేదనుకుని దారిన వెళ్తున్న ఒక ఉద్యోగిని ఆపి `` ఏమండి, రాష్ట్రానికి ప్యాకేజీ వచ్చిందా ? `` అని అడిగాడు.
`` ప్యాకేజీ కాదు కదా, స్టీల్ క్యారేజీ కూడా రాలేదండీ``
``మరి ఈ రెండేళ్లలో ఏం జరిగింది ?``
`` చంద్రజాలం, కనికట్టు, అరచేతిలో స్వర్గం ``
`` నదుల అనుసంధానం కూడా జరగలేదు``సుబ్బారావు బుర్ర గోక్కుని మళ్ళీ ఆస్పత్రికి వెళ్ళిపోయాడు.
``డాక్టర్ నన్ను మళ్ళీ కోమాలోకి పంపండి ``
`` ఎందుకలాగా ?``
``బయట ప్రభుత్వమే కోమాలో వున్న‌ప్పుడు ప్ర‌జ‌లు ఉంటే తప్పేంటి ``
అభివృద్ధి, సంక్షేమంలో జగన్ విజన్
