బాబు ఆవు వ్యాసం

                                 అమరావతి ప్రపంచ టాప్ 5 నగరాల్లో ఒకటి, అమరావతిలో అంతర్జాతీయ క్రీడలు, డ్యాన్సులు, హోటళ్లు, పార్కులు, రోడ్లు, చెట్లు, పుట్టలు..ఇలా ఈ అఖండ భూమండలంలో ఎక్కడ ఏది గొప్పది ఉన్నా-దానికంటే గొప్పగా అమరావతిలో ఉంటుందని బాబు గారు ఆవిధంగా ముందరికి పోయే పరిస్థితిలో తెలియజేసుకుంటారు. వంత మీడియా వంతులు వేసుకొని తాన తందాన అంటూ పాఠకుల చెవులకు బ్యానర్లు కట్టి, ప్రేక్షకుల కళ్లకు గ్రాఫిక్కులు పెట్టి తన్మయత్వంతో తనను తాను మరచిపోతుంది. ఇవన్నీ విని అమరావతి ఇంకెలా ఉండబోతుందో అని ఉవ్విళ్లూరిన వారి ఉత్సాహం మీద మొన్ననే నీళ్లు చల్లారు. రాజమౌళి లాంటి సినిమా ప్రముఖుల సహాయంతో కనువిందుగా-పైన పటారం లోన లొటారంలా ఉన్నా- కనీసం భారీ సెట్లయినా వేయిద్దామని బాబు సంకల్పించారు. చూసే వారికి వినోదం. బాలయ్యబాబు-సమయం లేదు మిత్రమా షూటింగ్ త్వరగా ముగించాలి-అని ఎప్పుడన్నా మీసం దువ్వితే అక్కడే శాతకర్ణి-2 తీసేయవచ్చు. బాబు ఏది చేసినా ఉభయతారకంగా ఉంటుంది. 

                                          నిజానికి ఆంధ్రప్రదేశ్ లో ఎవరైనా శాస్త్రవేత్త నోబెల్ అవార్డు తెచ్చుకుంటే వందకోట్ల రూపాయలు ఇస్తానని ముఖ్యమంత్రిగా బాబు ప్రకటించడంలో కూడా చాలా ముందు చూపు ఉన్నట్లు ఇప్పుడు అర్థమవుతోంది. సెల్ ఫోన్ నుండి, ప్రధాని-రాష్ట్రపతి వరకు ఎన్నో వస్తువులను, వ్యక్తులను, వ్యవస్థలను ఆవిష్కరించిన తనకే నోబెల్ వస్తుందని బాబు నమ్మకం. అన్నీ ఆవువ్యాసంతో ముడినప్పుడు-నోబెల్ అవార్డు-వందకోట్ల ప్రోత్సాహం కూడా ఆవు వ్యాసం దగ్గరే ముగుస్తుంది. 

                                    హెరిటేజ్ కు కూడా ఆవు చాలా ప్రధానం!